DOCUMENT 1
L'ORDRE D'EXPULSION
2 JUIN 1479
... Loys par la grâce de Dieu, roy de France, A tous ceulx que ces présentes lettres verront, salut. Comme, depuis que nostre ville d'Arras, qui est de l'ancien patrimoine et domaine de la couronne de France, a esté réduicte et mise en nos mains, les habitans en icelle DESCONGNOISSANT LES GRANS GRACES QUE LEUR AVONS LIBERALEMENT FAICTES, en leur pardonnant et abolissant les crimes, délitz, maléfices, rebellions et désobéissances par eulx faictes et commises, en leur restituant et laissant joir de leurs biens, lesquels avecques leurs corps, ilz avoient commis et confisquez par la rébellion et désobéissance, qu'ilz firent et commirent après l'obéissance par eulz à nous faite, et qu'ils EURENT FAIT SERMENT SOLENNEL de nous estre bons et loyaulx pour le temps à venir, AIENT TENUS MOIENS ET PRATIQUES AVEC LES AUTRICHOIS, noz rebelles et désobéissons subgets, DE REMETTRE ET LEUR BAILLER DE RECHIEF LA DITE VILLE EN LEURS MAINS ; por quoy, pour obvier à leurs mauvaises et dampnables entreprises, ayons toute ceste année tenu en garnison en ladite ville d'Arras, le nombre de huit cens lances fournies de nostre grant ordonnance, qui ont continuellement de jour et de nuyt, vaqué et entendu à la garde et seurté de ladite ville, sans bonnement nous faire autre service, parce qu'ilz n'ont osé saillir aux champs sur nos rebelles subgets ; et pour y donner ordre et provision pour le temps a venir, ayons par l'advis et déliberacion de plusieurs des princes et seigneurs de nostre sang et lignage, et gens de nostre grant conseil pour ce convoquez et assemblez en grant nombre, ORDONNE FAIRE WIDER ET MECTRE HORS DE LA DITE VILLE D'ARRAS ; les HABITANS EN ICELLE ET Y FAIRE HABITER ET DEMOURER DE NOZ AUTRES BONS ET LOYAULX SUBGETZ des villes de nostre royaume a nous loyales et obéissons, tant marchands de toutes marchandises que gens de tous estatz, mestiers et vacacions ; et, pour adviser et ordonner quelles gens marchans et de mestier seront nommés, soient choisiz et esleuz pour aller demeurer et habiter en nostre dite ville d'Arras, ayons par l'advis et délibération que dessus, ordonné FAIRE TENIR UNE JOURNEE ET ASSEMBLEE EN NOSTRE VILLE DE PARIS, au douzième jour de ce présent mois de juing, pour laquelle journée et assemblée tenir e par nous nous soit besoing commettre, depputer ordonner et establir gens notables et grant auctorité et prudence, qui nous soient seurs et stables..