|
|
|
Translaté
de Latin en François par maistre
Michel Nostradamus
Le seigneur Triuulce vaillant
home en fait de guerre, & en temps de paix a espousé femme, une dame Neapolitaine d'une tresnoble y honorable famille. Ie suis esté inuité au conuiue, mais plus tost au soupper pontificial &, sumptueux: mais moy aux premieres uiandes que feurent apportéez, ie feuz saoul: & faisois plus du spectateur, quedu conuiue. Ie pense qu'il te sera bon & aggreable, ou aux posterieurs, si ie te ueulx descrire les mets, & les uiandes, non pas ainsi que Macrobe enuers les nostres, ne Atheneus aux Grecz par grandz uolumes nous a laissé par escrit: mais tout ainsi qu'un homme occupé, & non excedant la mesure d'une epistre.
Premierement l'on donna l'eau a lauer les mains, mais non pas comme deuers nous l'on fait tout debout, mais bien elle feut presentée, quand un chascun feut assis, & par tout eau rose: en apres & tout incontinent feurent apportes le pignolat en tablete & roche fait de succre, eau rose, & pignons, & puis apres la tartre & massepan faits de succre,eaue rose, & amandes, que nous appellons communement pains Martiens.
Le second metz feurent des esparges nouuelles.
Le tiers metz c'estoient le coeur, le foye, & l'estomach des oyseaux, foyage les appellent noz cuysiniers.
Le quatriesme metz la chair de dain rostie.
Le cinquiesme les testes des ienisses & ueaux boullies auec leurs peaux.
Le sixiesme chappons, poulailles, pigeons accompaignez auec langues de beufz, iambons de truye, le tout bouilly, adiousté auec la saulce du lymon: ainsi les cuysiniers Milanoys les appellent, ce que nous cuysiniers Venitiens appellent sermiaque.
Le septieme le cheureau tout entier rosty, à un chascun dens une assiete d'argent, en forme quadrangulaire, auec le ius qui se fait des cerises amayres, ou comme aucuns aiment mieulx appeller, cerises de laurier, qui se fait en lieu d'une saulse & condiment.
Le huictiesme tourterelles, perdrix, faisans, cailles, gryues, bequeficz, & de toutes manieres de uolataille, mollement & studieusement rosties, les oliues Salonnoises,colymbades feurent mises en lieu de condiment.
|
|
|
Le neufuiesme un coq cuit auec le succremadefié & arrousé auec l'eau rose a un chacun des conuiuéz dens une petite platine d'argent concaue, ainsi comme toutes les autres uaisselles.
Le dixiesme metz c'estoit un petit cochon tout entier rosty, à un chacun deux sus un petit uaisseau escuelle, ou il y auoit une certeine liqueur à chacune uaisselle.
Le unziesme metz c'estoit un paon rosty, & pour son condiment il y auoit une saulse blanche, ou plus tost ferruginée, qui estoit de foyes pistez, & d'une precieuse & aromatique composition, adioustée selon la proportion & simmetrie, les Espagnolz l'appellent Garrouchas. dragée musquée. Et apres ilz feurent amenes ioueurs de farces, & comoedies, battelleurs, & ioueurs de goubelletz, et faiseurs de soubresaulz, ioueurs de bonnes moralitez, chemineurs dessus les chordes: d'autres qui de leur bouche contrefaisoient toutes sortes d'animaulz, de toutes sortes d'instrumetz à fleutes, ioueurs de lucqs, orgues, espinetes, guiternes & psalterions,
Le douziesme metz c'estoit un monde tortu, & recroquillé, qui estoit fait d'oeufz, laict, saulge, farine, & succre: nous l'appellons saulgret.
Le treziesme metz estoit cartiers de coings confitz auec succre, girofle & canelle.
Le quatorziesme c'estoient costes de chardons, pignons, artichaulz, si uous aimes mieulx.
Les quinziesme, apres que les mains feurent lauées, toutes sortes de dragées, comme coriandre, fenoil de Florence, amandre, anis, giroflat, orengeat, canelat, aloient deuant, & estoient concauez dedens:ou il y auoit de toutes sortes d'oyseaulx,& autres animaulx de quatre piedz: & d'autant de sortes qu'il y auoit de touts oyseaulx & autres animaulx cuictz apportéz à table, autant en y auoit il des uifz: une chacune table estoit adaptée auec ses sieges & son buffet: & ceux qui seruoient aux priuez, estoient priuez: les ministres cogneuz aux cogneuz: deuant toutes les autres choses, il y auoit une silence telle que nul onques de la secte Pythagorique n'y obserua iamais.
Dieu soit auec toy, de Milan
Ce VI. de May M.CCCC.LXXXVIII.
Michaël Nostradamus
Sextrophæanus
faciebat Salone
litoreæ,
1552.
|
|
